九井壽司 (已結業)

收工去MegaBox搵嘢食，行經有一層專賣BB仔野嘅樓層旁邊竟然有一間壽司舖，仲要有列車送餐做噱頭，就即刻入咗去試吓！舖頭食物定價都非常相宜，而且全部食物都會係有列車送上，真係又有得玩又有得食。我同朋友嗌左超過八款壽司，仲有帶咗一碗烏冬同兩件手卷。首推一定係火炙鹽燒鵝肝壽司，第一件送上嘅時候簡直嚇一跳，因為完全冇諗過塊鵝肝竟然係咁大塊，超級抵食，所以前後一共帶咗三件，所以鍾意食鵝肝嘅朋友千祈唔好錯過！另外想推介嘅係火炙芝士蟹棒壽司，蟹棒十分大條，配埋芝士一齊食簡直係超級夾，好惹味！至於手卷方面，我哋揀咗軟殼蟹手卷同埋鰻魚手卷，手卷唔會只有好少嘅餡，所以食完手卷其實都有啲飽肚。見到隔離枱有嗌一大碗烏冬，所以都想叫黎試吓，最後揀咗豬軟骨烏冬，豬軟骨煮得非常之淋，而且好入味，烏冬用上讚岐烏冬，煙煙韌韌，亦都唔會有平時烏冬常有嘅酸味，分量亦都十分大碗，好味！總括嚟講呢間餐廳嘅壽司定價偏低，所以好抵食，而且種類都算多，用料新鮮，份量亦都唔少，餐廳位置可能唔太顯眼，但係真係值得專誠去試吓！