銀座神樂屋 (已結業)

火鍋連日式放題，當夜同朋友共4人由1830食到2200，唔限時，又唔會催人走。火鍋有好幾個價錢選擇，當晚揀左最平$248果款，2個湯底，1款肉(豚肉)。個人認為要視乎各人嘅大食程度因爲火鍋以外嘅食物都有好多選擇。刺身好新鮮仲唔孤寒，有份量。 炸蝦天婦羅都係必食，脆漿做得好好，唔會太厚。炸得啱啱好，完全唔油膩。甜品方面雖然唔太多選擇，但雪糕係一致認為最出色，有牛乳味同朱古力味，個人喜歡牛乳味，超級香滑，食到好飽都至少要食2杯。而朱古力味都做得好好，佢同其他地方最唔同嘅係你會食到苦味，係用純黑朱古力去做，如果怕苦佢地有mix版，2者融合非常好味。