影片
更多
2008-12-04
6 瀏覽
近排成日出街食飯, 開始都唔知食乜好喇, 來來去去都係茶餐廳, 中, 西, 意, 法, 日, 台, 越, 港; 終於星期一嗰日決定吓其他菜式... 就嚟個星馬啦!今日得兩個人食飯 ( 拍拖嘛 ), 所以叫咗個 2 人 C 餐 $218, 加多個例牌秘制招牌雞 $40, 我個餐飲係藍莓益力多沙冰, 而佢就飲咸檸七.2 人餐有: 馬拉盞炒通菜 ( 不過因為通菜唔當造, 唔夠靚, 所以老闆提意改椰菜 ) 巴生肉骨茶一煲 ( 連油炸鬼一碟 ) 阿參魚頭煲 白飯兩個 首先嚟到嘅係餐飲, 個藍莓沙冰酸酸甜甜又夠凍, 影真開胃, 正!跟住就嚟個肉骨茶喇, 嘩, 煲肉骨茶一到就已經聞到好香嘅藥材味, 未食就已經知道一定好保 ( 成日出街食得多味精, 係時候保保佢 ); D 排骨好淋好夠味, 雖然個湯就比起我去馬來西亞嘅淡, 但以係香港嘅嚟計已經好濃味o架喇, 始終係香港嘛, 梗要就返 D 香港人口味嘅! 再嚟嘅係阿參魚頭煲,
今日得兩個人食飯 ( 拍拖嘛 ), 所以叫咗個 2 人 C 餐 $218, 加多個例牌秘制招牌雞 $40, 我個餐飲係藍莓益力多沙冰, 而佢就飲咸檸七.
2 人餐有: 馬拉盞炒通菜 ( 不過因為通菜唔當造, 唔夠靚, 所以老闆提意改椰菜 )
巴生肉骨茶一煲 ( 連油炸鬼一碟 )
阿參魚頭煲
白飯兩個
首先嚟到嘅係餐飲, 個藍莓沙冰酸酸甜甜又夠凍, 影真開胃, 正!
跟住就嚟個肉骨茶喇, 嘩, 煲肉骨茶一到就已經聞到好香嘅藥材味, 未食就已經知道一定好保 ( 成日出街食得多味精, 係時候保保佢 ); D 排骨好淋好夠味, 雖然個湯就比起我去馬來西亞嘅淡, 但以係香港嘅嚟計已經好濃味o架喇, 始終係香港嘛, 梗要就返 D 香港人口味嘅!
再嚟嘅係阿參魚頭煲, 其實我都未食過, 所以更加好奇想知佢點阿參法.
個魚頭好鬼死大, 我哋兩個人都只係食到個半, 淨返半個都食唔哂; 而個汁就少少辣辣哋, 但食到入面有好多香料味, 有 D 似四川麻辣味, 不過就梗係冇咁辣啦, 而家天氣凍凍哋啱哂!
最後就係拍住拖上嘅馬拉盞椰菜 & 秘制招牌雞 ( 呵呵, 好似我哋咁喎 ), 先講咗碟菜先啦, 講真, 馬拉盞炒通菜平時食得多, 但係炒椰菜我都係第一次, 出奇地, 馬拉盞咸味 + 野味同椰菜嘅甜味好夾得嚟喎, 睇嚟老闆係介紹之前都有諗過work 唔work 架喎!
秘制招牌雞, 雖然一嚟就見到嗰 D 肥膏唔多敢食, 不過話哂人哋個名都叫招牌雞吖, 梗有返兩手o掛, 於是就膽粗粗先食一舊連皮連膏嘅雞先, 嘩 , 超滑呀, 舊雞真係好鬼死滑o架, 加埋個汁甜甜哋, 好鬼正, 連阿媽整嘅新鮮雞都冇佢咁滑, 之後再食返舊去皮去膏嘅都一樣係咁滑, 係而家新鮮雞賣到咁死貴嘅時候, 可以將冰鮮雞做到咁滑令我都忍唔住問老闆點先可以整到咁滑, 原來得一個字 " 肥 ", 佢話 D 雞唔夠肥係整唔到咁滑o架, 既然係咁我唯有唔食皮啦, 冇辦法, 身型緊要嘛, 一陣我肥到好似隻雞咁男友仔唔要我咪死! ( 但佢又會唔會聽完老闆咁講之後, 換另一個角度諗我肥 D 咪滑 D 囉! )
Last 埋單竟然只係 $227, 原來星期一至五有 88 折, 咁又幾抵食喎, 下次大家出街食飯唔知食乜好可以去試吓!
張貼
