新金榮小廚

營業中

休息中

呢間位於麒麟徑嘅妹姐打冷小廚其實即係隔離新金榮啲分支，睇佢個餐牌就知。每次一嚟就係為咗佢個鐵板薑蔥魚扣，佢地用嘅係烏頭魚扣，魚扣即魚胃，需知一條魚只得一個，所以同魚鰾一樣要儲儲埋埋留起一堆先炒到個餸。很好此物，大概小童彎起嘅尾指咁大，個樣白潺潺但入口係極爽口又唔腥，而且店家用薑蔥爆佢直情係絕配，每碟雖然蔥蒜較多，但都有廿幾個魚扣算係咁，極好送酒又滿足嘴饞。講完我心目中嘅主角，其他綠葉都有一定份量，否則點可開舖多年。怕全碟炸大腸太滯胃，拼炸豆腐就啱哂，大腸底下墊左幾片菠蘿，又解吓啲油膩。黑椒魚雲茄子煲、䜴油皇炒麵都係夠鑊氣之作，尤其炒麵落好多洋蔥去兜，冇一般大排檔嘅令人皺眉嘅過鹹，又係三扒兩撥食哂。