雲南啊老表黑山羊湯鍋米綫 (已搬遷) 新店位置

一直都有聽過人哋講係佐敦嘅雲南呀老表黑羊湯鍋米線好好食，所以今日放工特登同男朋友去試吓，因為男朋友都鍾意食羊，但係我就有啲怕會"so"。我哋七點鐘就黎到所以都有幾多位。餐廳又唔係話有勁多種類嘅嘢食，我哋最後叫咗一個羊肉清湯米線同埋一個羊肉酸辣湯米線。小食就叫咗避風塘麻辣雞翼，同埋上湯生菜。我覺得佢嘅羊肉米線好好食，雖然我叫咗清湯，個湯好有淡淡的羊味，一啲都唔so，反而好鮮甜，真係勁好味，個羊肉又唔係太韌，都好食。而男朋友叫個酸辣湯都好食但係都幾辣。小食方面，個避風塘麻辣雞翼好惹味，我覺得佢個味有啲似土匪雞翼，啲雞肉好juicy,好滑，我哋都覺得好好味，而且個雞翼都好抵食，四隻都係$22。個生菜原來都係用佢嘅清湯煮嘅，所以都有淡淡的羊肉味，好鮮甜呀啲菜。野飲我就叫咗凍檸茶，男朋友就叫咗凍茶蜜，我覺得都ok , 茶蜜就係用菜蜜沖嘅。人均消費大概$80左右，我覺得以呢個價錢食到靚嘅羊肉米線都好抵呀。