新曼谷泰國菜館

營業中

休息中

係灣仔番工已經有一段時間，唔係食港式野就西式野，終於要突破框框，難得同其他部門同事食飯，所以佢地帶我去食泰國菜，位於軒尼詩道嘅新曼谷泰國餐館。同事介紹話唔貴之餘，質素都唔差咖。 是日可能落雨，唔算太多人。但聽聞樓上有雅座，所以其實都無須擔心會無位坐。睇睇個餐牌，以泰國菜加呢個地段，果然價錢唔算貴，而且仲送一杯飲品，其實仲好化算添。最後，係海南雞飯同金邊粉之間掙扎，優先試咗海南雞飯先啦！我諗大概等咗五至七分鐘，我地嘅海南雞飯陸續到，飯同雞整體感覺唔錯，唯獨執邊啲配菜令人感覺有點不安。試下個海南雞，已經去骨十分貼心，幸運地得到雞脾嘅部位，所以入口嫩滑無可挑剔。海南雞點蘸埋個泰式酸辣汁，再同埋飯一齊食，真係好開胃。整體雞、飯、醬汁中規中矩，但配菜果然係唯一敗北嘅地方，除咗無味，入口有種生生嘅口感，真係寧願無配菜。其實跟餐仲附送咗一碗蔥花雞湯，但口味方面，我覺得有點太濃，所以沒有多飲。但同事有好好飲哂碗湯，佢覺得仲幾好飲，因此每人口味各有不同。總結，夏天難免胃口差，泰國菜既酸又辣就岩哂，立刻食慾大開。所以呢到價錢唔貴，其實都係一個幾好嘅放飯飯堂。絕對有機會試埋個金邊粉。