杏香園 (已結業)

每次來九龍城都係夜晚嘅時候，今次亦都唔例外，上次其實有幫襯過呢間鋪頭但就冇寫到食評，今次既然係第二次幫襯，呢個食評就唔可以再唔寫啦。呢間糖水舖寫到明係由澳門開到過嚟香港，喺糖水舖雲集嘅九龍城黎講，佢哋嘅糖水的而且確有唔少嘅特別之處。講用料，的確非常新鮮。而糖水款式亦都唔係局限於只有雪糕或中西合璧個類型嘅甜品。成間鋪頭賣嘅都係手工甜品，仲要係一啲比較嘥時間去煮，去預備嘅舊式中式甜品。嗰晚我要左一碗木瓜雪耳百合糖水，一攞上嚟嘅時候真係大碗到嚇一跳。既然係糖水顧名思義就係甜嘅，雖然我個碗糖水係熱嘅但係木瓜就唔係話完全好熱，而雪耳就煮得非常之軟身，蓮子就好鬆化。而當晚有人要左一碗椰汁涼粉，試咗一啖之後淨係覺得椰汁味非常之濃，好唔好食就真係見仁見智，如果你鍾意好椰子味嘅嘢，呢款糖水應該幾啱你。最後賣單HKD99，我就覺得唔平，但如果比較起來食雪糕或者食啲fusion嘅甜品，我會寧願幫襯呢一間。