日和号壽司料理 (已結業)

阿仔係鐵路迷，所以一直都好想食呢間日和号壽司料理，不過之前見過幾次都要等位，難得今日平日夜晚嚟到唔使等位，就一於入去幫襯。入面嘅裝修富有日本鐵路特色，小朋友就最鍾意。原來依家做緊單點刺身、壽司半價優惠，所以我哋盡情咁點餐，完全唔需要睇價錢。刺身就揀咗帶子、油甘魚、八爪魚同甘海老，半價後每款只需要$26起，真係好抵食。我哋真係點咗勁多壽司，包括有吞拿魚壽司、胡麻醬火炙帆立貝壽司、七味火炙鱈場蟹壽司、火炙三文魚腩壽司、稻荷蟹籽沙律壽司、火炙左口魚邊壽司同鰻魚壽司。半價後嘅壽司每碟只係10幾蚊，真係平到不得了。其中六吋三文魚壽司半價後只需要$19，仲平過食刺身。吉列炸蝦壽司($18)原來係即叫即炸，所以分開上碟，非常新鮮。另外仲叫咗一系列嘅軍艦，包括三文魚籽軍艦、芝士蟹籽軍艦同埋海膽軍艦，同樣即叫即做，所以紫菜非常香脆。其中八爪魚小丸子都有半價優惠，阿仔就最鍾意。既然咁抵，就一於叫返兩杯梳打，白桃乳酸梳打同埋梅子青檸梳打都好清新又唔會太甜。呢度嘅壽司刺身唔單止抵食，店員嘅服務亦都好好，所以呢餐我哋都覺得好滿足！