Express Bar by Lassana (友邦九龍大廈) (已結業)

話說同一大班細胞小組組員參加完運動會，嚟到長沙灣廣場嘅潮濠城飲茶食點心，順道慶祝3、4月嘅生日之星，仲打孖預備咗兩個細蛋糕為佢哋慶祝，其中一個喺Express Bar by Lassana嘅法式「焦糖朱古力慕絲蛋糕」（$138）。首先講賣相，百零蚊個蛋糕都睇得出落足心機晌外觀上，巧妙利用面層焦糖漿嘅古銅色，襯啲杏仁朱古力薄脆片已經令賣相變得好精緻、雅氣，帶股復古風，真喺值得一讚 。落刀嗰吓已感到啲焦糖慕絲好幼滑，內裡仲夾雜焦糖啫喱、軟心焦糖粒，令整個蛋糕都充滿焦糖嘅甜蜜，讓人食落有份幸福感 ；如面層嘅焦糖漿減低少少甜度，相信更多人接受到，因為依家有啲組員感到有啲「漏」；餅底用上朱古力餅底，覺得可以做番大個少少，因為，切開之後好承托啲，一件件分比其他人都易啲 。雖然有些微地方需要調校吓，但質素稱得上上乘高水準，加上以焦糖為題，就更啱我個人嘅心水，焦糖粉絲真喺唔好錯過！