建興亞婆豆腐花

營業中

休息中

南丫島行山前必定會係起點食個阿婆豆腐花先上路。 黎過幾次都只係見到阿嫂，今次終於證實都市傳說中既阿婆仲在生！聞名不如見面，見阿婆仲好精靈，食到佢親手畢既豆腐花，頓之有種延年益壽、如浴春風之感。豆花有冷熱之分，落單俾錢後等阿婆整好放係托盤，就自行拎埋位食。凍豆腐花 ($12)軟滑既豆花近乎係口內化開，輕輕用脷尖一頂就吞得，味道清新、豆味唔算好濃郁，勝在夠凍夠滑。 阿婆淋上既黃糖漿濃度猶如蜜糖，即使我慣左食幾啖豆花落一次糖都頂唔住，最後要隔左d糖黎食，反而原味清清地仲正。大熱天時係樹蔭下、吹住涼風食個凍冰冰既豆腐花的確係人生一大樂事，可惜由離遠見到檔口開始，及至特意選擇最角落既通風位置，從頭到尾都傳來陣陣坑渠味，有少少難以下嚥。 明明上年黎既時候都冇呢個問題，睇黎天氣對附近既環境衛生有一定影響。當然一場黎到我依然會堅持幫襯，希望婆婆身體健康，下次再見面啦。