麵屋黑岩

營業中

休息中

一直以為深水埗得黃金果頭比較多好野食，今日竟然比我起大街長沙灣道發現咗呢間拉麵舖，都幾好食。餐牌其實好簡單，有7款拉麵，都係豬骨湯底，我同友人分別嗌了一個辛辣拉麵，一個少啲見到嘅蟹肉拉麵。拉麵有得揀軟硬度，配菜有得揀葱或者椰菜，我朋友因為唔食蔥所以可以揀椰菜都幾好。最驚喜既係叉燒竟然有得揀火炙或者厚切。我自己就好鍾意我個辛辣拉麵，湯底好濃豬骨味，配埋辣肉碎食一流。我揀咗厚切叉燒，叉燒非常之好食，雖然係厚切但唔會太肥膩，仲勁大塊，抵食。朋友嘅蟹肉拉麵湯底原來除咗有豬骨味，仲好重蟹味，配埋啲蟹肉都幾好食，咁的配搭其實幾特別。朋友叉燒係火炙，因為燒過，口感都唔錯，但我就覺得厚切叉燒更好食。另外我哋加咗隻溏心蛋，都唔錯，醬油味非常之重，配拉麵食正！原本見到小食有一個薯片雞翼好似幾吸引，但係我哋因為太夜嚟食，已經賣曬，所以轉咗嗌蝦餅，又估唔到幾好食，仲有三塊咁多，同埋因為新鮮炸，好熱好脆。臨走見到原來平時有午市套餐，會跟小食/飲品，下次經過深水埗會再試下。