和幸小料理 (已結業)

佢初初開時我已經去過，嗰陣時成間嘢得兩三檯客。嗰陣真係幾好味，亦睇住師傅好用心做燒物。跟住我 keep 住一個月去一次左右。近兩三個月因去旅行及工作忙而無去。早幾日再去，點知又加價又縮水。原本加價係 OK 的，因通漲影響貨價我都明白，但一來加幅幾大，二來用的手法好狗囉。以前我最鍾意食佢哋嘅燒牛舌，一串四塊好似賣 $28，每塊約 1.5 x 1.5 寸，而且都有番三分厚。而家加到 $32，每塊縮水到 0.75 x 1 寸，仲薄到豬頸肉咁，真係好離譜吓！燒雞翼仲衰。我唔記得加咗幾多價，都算啦。我唔記得分量，於是問個 waiter 一串有幾多隻，佢答兩隻。到上台時，我心諗佢哋去邊度搵咁細隻雞？乜隻翼咁細嘅？原來唔係，佢哋將一隻雞翼打橫切開來燒當兩隻！仲有無狗啲？碗和牛烏冬加到 $146 一碗！而且啲稻亭烏冬已經完全無晒以前煙靱的感覺。唔係差，只係普通料。但 $146 碗喎！淨稻亭烏冬佢哋都賣緊 $88 碗喎！咁嘅料？總之食完呢餐，完有有種「睇住佢大，睇住佢壞」的感覺。我諗我唔會再去了。