聯和素食 (已結業)

同事題意黎食下齋，黎到聯和素食，原來呢度好出名，要訂枱架，如果唔係lunch time有排等。今日好好彩，老闆幫我地叫啲食客掉位黎讓張大枱比我地，等左一陣就有位。餐牌好多野揀，雖然話係素，但啲名都係“肉”黎架喎，快快落單試下先。老闆問開唔開茶開就計茶錢，咁鐘意飲茶嘅我梗係開啦，普洱茶，水滾茶靚。另叫小炒餐就有餐湯送，雖然無人人叫餐，但老闆都比足咁多人頭。紅青蘿蔔粟米湯，清甜好飲。黑醋琵琶豆腐 $58新鮮炸起好香口，一啲都唔油，豆腐淋得黎又口有咬口，點啲黑醋汁好開胃，食哂都唔覺膩。金牌生炒骨 $58甜甜酸酸好正，雖然係素，但食落好真，有排骨味，大大碟，正呀。燒汁素鰻魚飯 $38個樣望落唔似鰻魚，但又真係有鰻魚味喎，好搞笑。超大碗飯，如果燒汁再多啲就好啦，撈汁好好味。川味素回鍋肉 $58又係好真回鍋肉味，仲有肉嘅口感，唔知用咩整肥膏個part呢？半透明個樣超真！！西芹老左啲有，其他炒得好味。酵母刺身壽司 $38刺身個樣真係呃得人呀！但可惜味同口感都唔似，都幾好味嘅，黃色粉唔知係咩黎呢？食唔出有味？價錢都幾大眾化，老闆又勤加水，但廚房得一個，出菜出得慢，趕時間就唔多識合黎嘞。