Aaharn (已結業)

Aaharn一直係我好鐘意嘅一家米其林餐廳，佢宜家週六都提供lunching tasting menu，唔錯。前菜有4款，鳳梨配棕櫚糖，好特別啲小前菜，棕櫚糖調出鳳梨甜味，好食。檳榔葉，豬肉，虎蝦沙拉及泰橙汁，醬汁食落少少酸辣，調味好出色。椰子煨黃豆蘸醬配香脆米餅（素），米餅一人2件，我同FD都覺得同蘸醬唔係好搭，分開食都好味，夾埋一齊少少怪怪地。烤鴨椎茸椰青湯，哩碗湯不得了，落咗椰青椎茸，飲落真係好鮮甜。鴨肉烤過，食唔到鴨肉臭味，勁like。清邁蘸醬配泰國時蔬（素），蘸醬睇落唔會好辣，結果出咗事。哩款蘸醬辣到乜程度，兩個平時唔食辣嘢啲FD，話辣度直沖天靈蓋，差啲透唔過氣。我平時食得好辣，食完都覺得勁辣，好似同時食咁3-4個小米辣椒。最後大家食完一啖就算數，唔可以食辣啲FD真係要小心。薑黃咖喱蝦配檳榔葉，咖喱汁偏甜少少，唔係好食得出薑味。整體調味好有層次，就飯一流。炭烤雞沙律配黃茄子，哩款主菜係今日最愛。雞肉唔會好柴，食落好嫩滑，沙律醬偏酸，整體食落特別清爽。炒泰國時蔬，揀咗最幼嘅蘆筍尖搭配泰國蔬菜一齊炒，真係可以食到蔬菜清甜味。芒果糯米飯，蒸棕櫚糖椰蓉湯圓，甜品細細件，都係一口一件。