金鶴拉麵 (九龍城道) (已結業)

️喺日本食過雞白湯拉麵之後一試難忘，好想喺香港搵返嗰種味道，見到呢間金鶴拉麵咁多分店，相信佢有一定實力一於試吓。🥢濃雞白湯拉麵$138第一時間就點我最期待嘅雞白湯拉麵，普通版$98濃湯版$138 ，標榜用原隻雞烹煮8小時以上嘅濃厚雞白湯，其精華就係天然嘅骨膠原，對健康及美顏非常好，係女士嘅天然護膚補品，奶白色嘅濃厚湯底盛載著香脆炸牛蒡、低溫慢煮嘅超滑叉燒同雞肉、煙燻蛋，拉麵十分掛湯，每一口都可以嚐到鮮雞熬製濃郁嘅湯，食完都覺得好養生。🥢香辣豚骨湯拉麵$98嗜辣嘅朋友試咗呢款用過十款以上香料提煉出嚟嘅秘製香辣味噌配上經過8小時烹調嘅豚骨湯底，豚骨湯順滑口感濃厚，香、濃、辣嘅味道交集埋一齊衝擊味蕾。🥩黑椒牛舌串$68即叫即燒，牛味香濃，牛舌好厚身，食落軟淋淋好嫰滑。🌟呢間拉麵嘅湯頭用心，麵質彈牙，仲有蟹湯/蝦湯可以選擇，亦有鰻魚飯、多款串燒等，仲有得外賣自取，下次會再試埋其他湯底嘅拉麵。