Jacomax (已結業)

朋友家姐之前時喺上環食過呢間Pizza ,覺得好好食，一直推介我哋去試。咁岩喺灣仔見到呢間pizza店就試吓係咪咁好食。呢間Pizza嘅種類都多，問咗店員有咩介紹，佢就介紹左最出名兩隻薄餅。一個係T - Rex 暴龍，一個係gorgonzola&ape 藍芝士蘋果薄餅。因為我哋得兩個人叫兩個Pizza實食唔晒，我哋諗緊點算好嗰陣，店員介紹話可以一半一半，可以根據自己嘅喜好選擇組合，師傅會就即場整個Pizza。我哋最後叫咗一半T -Rex 一半藍芝士蘋果薄餅。師傅整緊嘅時候仲可以即場睇曬成個過程，都幾得意。同埋雖然即場整，但係都好快手就有得食。藍芝士蘋果超級好食，好啱女仔食，因為甜甜地，芝士味啱啱好，又有口感，大推！暴龍Pizza呢就係咸嘅，佢嘅料都幾多架，都唔錯食，不過男仔就會鍾意多啲啦。另外我哋都叫支水果酒Linesman peach ，都係店員介紹架。超級適合女仔，酒精唔高但係甜甜地又有少少酒味，同Pizza超夾。呢間Pizza真心覺得好食，而且裝修都好有格調，我哋仲發現咗原來一幅大油畫係話畫緊Star Wars。同埋佢嘅設計都好舒服好啱情侶或者朋友坐低一路食嘢同傾計，推介！ ！