篤篤車 (已搬遷) 新店位置

上星期橫風橫雨，但係因為呢個「篤篤車」嘅新字頭係新界殺出一條血路，所以就算兩父子變落湯雞，都要坐小巴入元朗去試一試呢個泰式車仔麵。我點左冬陰公小辣湯底河，配雞翼，蘿蔔，響鈴同辣豬皮。父皇點左鱷魚骨中辣湯底粗，配蘿蔔，牛柏葉，金錢肚。一黎就當然要試試佢個湯底，鱷魚骨湯非常足料，而且唔會好腥，甜甜地，非常特別！一試就後悔自己無點鱷魚骨湯😅 冬陰公湯就鹹左少少，不過好欣賞佢唔係椰奶味重嘅冬陰公，而係辣味重的清冬陰，好惹味！我同父皇都一致認同蘿蔔好好食，父皇話食得出蘿蔔無浸過糖水，天然甜同無渣！辣豬皮爽口彈牙，雞翼亦非常滑同入味！想特別推一推嘅係呢個炸魚皮配自家製清新醬。魚皮炸得好脆口但係完全唔油膩，浸一浸下d湯，超正。不過份量就少左d。要同父皇鬥快夾🤣 下次黎嘅時候，要一人一份炸魚皮！一定要讚嘅地方係你食完之後係完全唔會覺得口渴，真材實料，無落味精，呢個fusion fuse 得靚！就連平時食野特別有要求嘅父皇都一d微言都無！