琪琪海鮮泡飯專門店 (已結業)

Item: 琪琪海鮮泡飯專門店
Rating: 3
Author: 奧志雷

4.5

14 食評

味道

環境

服務

衛生

抵食

458

紅磡

$51-100

港式粉麵/米線湯品茶餐廳/冰室

奧志雷

等級4

2.1K

我工作到有點攰喇，要飲個靚燉湯補一補去。琪琪主打龍蝦湯泡飯、波士頓龍蝦、花膠雞湯，而且可以加排翅添。不過龍蝦湯配及弟豬雜或蠔仔肉碎硬係怪怪的，菜色諗頭特別，非常創新。老闆推出新蟲草花菜色喎，對我來說不怎吸引。

炸魚皮，外購無特別，咸咸脆脆，浸湯較可口。北菇花膠湯粗麵，滿滿的湯、大大的菇、厚厚的花膠、多多的麵，還有幾片菜，交足貨無手軟無欺場。彈滑花菇爽爽多汁，菇味香濃甜美。粗麵充滿蛋香並不是廉價貨，彈彈滑滑拖著特濃雞湯夾綿綿花膠啜晒入口，熱辣辣暢快無比！

花膠雞煲翅，足料半隻雞、約 2 片排翅加約 6 片花膠，落足本錢不計成本喎。不過花膠極期量只係高質魚肚，未有耐到達花膠級別。砂鍋滾熱辣香噴噴，使得我涶延欲滴。忍不住急急灌啖滾湯品嚐，燙死我喇﹗不過越熱越好飲喎，還好沒有甩皮起水泡乍。

味道堅得無得頂，雞湯味嗆爆霸道，甜美出眾黏黏的。花膠厚厚綿綿少少黏少少膠，靚魚肚類吸盡雞湯精華，回味無窮！一入口就使我陶醉萬分。還以為會比火鍋花膠桶灼到綣埋趙到爽爽聲既低級貨，老闆無搵笨，靚貨食得過！排翅同樣吸湯一流，微量爽脆翅針，跟濃湯一起灌到嘴仔脹卜卜，幸福滿足開心晒！

波士頓龍蝦海鮮龍蝦湯，珍珠蜆鮮甜肥美海水味濃，帆立貝沒有味道的雪藏貨，青口過熟粉口不彈不滑不鮮，大蝦烚到過晒火，韌韌的肉幸好還剩一點蝦甜味，魷魚硬硬的魷魚鬚，魷魚味濃，生菜最爽甜。海鮮大部份都滾到過熟，師傅打算做湯渣不作食用的嗎？龍蝦湯底夠濃夠香蝦味突出，最衰欠缺鮮味。

姐姐話海鮮湯先上，龍蝦要稍後。隻龍蝦 BB 三催四催十幾分鐘後送到，海鮮湯一早食晒咯。翻烚龍蝦過晒火，眼見龍蝦肉已委縮崩緊，肉質韌韌不爽彈，幸好還保有鮮蝦天然清甜味，綿綿蝦膏甘甜可口，免強合格唔難食。

蠔油唐生菜，清淡白灼生菜沾點鮮味蠔油生息不少，不咸不濁，難得的爽脆清甜，大注大注塞入口，趙到索索聲，菜甜味非凡可口，次次都食到我眉飛色舞，超級高質無得彈，堅好味道，回味無窮。

波士頓龍蝦魚翅花膠湯幼麵，最好味係片唐生菜，爽嫩鮮甜還有陣陣雞湯味道。真的不太想食飯，只有幼麵或幼麵供應，唯有幼麵啦！如果有出前一丁、福字伊麵就好咯。起步即時連麵帶湯大大啖狠狠地啜入嘴仔之中，臉色一沉，嚇得我額頭冒汗！那股鹼水味強烈霸道，用意志力免強還頂得住！

硬著頭皮捲起綿滑花膠跟濃湯馬虎地掃晒落肚算數，長痛不如短痛！師傅過水不夠乾淨，麵質偏腍不爽，就連雞湯底都被污染，散發著陰沉的鹼水味，好好的花膠雞湯就如此被糟塌了﹗師傅不想麵餅過水麻煩，不如轉用熟麵或蝦子麵，更方便又更好食。

半隻龍蝦留到最後慢慢嘆，挑起整舊用豪快一啖消滅。始終煮得過火，幸好無早前過份到乾硬鞋，還有微弱的爽彈，少少蝦甜味，少少肉汁，蝦膏甘香。烚定翻熱必定過熟，其實即烚開邊龍蝦仔 30 秒搞掂，就會爽彈鮮甜啦，都不是太花時間之麻。

沙薑雞飯套餐，包鮮雞湯、蠔油生菜、白飯，都好豐富啊。我都話要半碗飯咯，次次都唔聽人家講，食唔晒又浪費喇。靚靚仔仔排得精緻送到，未食已聞到香噴噴的沙薑味，食慾大增口水流！暖暖的張雞件放到舌頭上，一捲一啜骨肉分離。

肥美脹卜卜不油膩，驚喜的沙薑汁，調得剛剛好，味濃清香十分醒胃，最重要係無咸到盡頭，撈飯一流﹗忍不住一啖兩啖三四五啖都要淋上沙薑汁，白飯搭上嫩滑咸香勁彈雞肉，越食越起勁，最後使到我連飯都唔夠食，有添飯的衝動，人家唔想食太多飯架，實在太過份。還剩兩口白飯，換換食法轉為沙薑汁雞湯飯，同樣美味無比，豪氣地全部灌晒落肚，really Good！

口水雞飯，同事食過大讚，我就來研究一下。冰涼切雞感覺到放過風櫃或雪櫃剛剛取出，要凍住食，扣分。我年青時做過快餐店，會用滾燙高湯拖拖淋淋雞件，起碼暖暖地才端出給客品嚐呢。只在表面鋪上辣醬，沒怎樣有汁。

其實我只食髀的，現比得幾舊雞胸及一隻全翼，教我情何以堪呢，都照食啦。雞胸腍、雞翼滑，涼浸浸骨杉杉唔開心。辣汁味濃，麻味突出非凡，麻到出汗刺激開胃，還散發少少醋酸味，使到食慾立刻大增，撈上紅油咬啖雞肉，不知不覺成碗飯食晒。

雜菇原隻波士頓龍蝦湯飯，還加入大量生菜、雞髀菇及秀珍菇，增添更多味道及香氣。半斤龍蝦仔連烚菜送湯飯實惠價 $138 蚊，價錢合理。老闆立即吩咐叔叔從廚房挑選隻生猛龍蝦即劏即煮，跟預早煮定再翻熱的當然有天淵之別。

蝦肉爽彈無比，鮮味非凡出眾，啖啖水潤充滿蝦汁，蝦膏甘香芬芳醒神，那有不好吃的理由，海產夠新鮮根本不用再加任何調味已好食到升仙啦。頭啖湯滾燙燙試多幾口，濃厚龍蝦味道，泛著獨特清甜鮮味，還散發陣陣菜甜菇香。

將大量龍蝦湯倒進白飯之中，直到蓋過所有，大大啖連湯塞進嘴仔，似乎濃湯被白飯所沖淡不少，略加胡椒粉點綴一下，即時生息不少更加好味道。半邊龍蝦肉挑起完整啪入口，食得豪爽暢快 ﹗姐姐比成盒套我仲咩啫，最憎帶套 ﹗非常有隔膜，我完全同唔到隻龍蝦溝通，比盒紙巾我好過啦﹗食家鄉雞、雞髀、鵝髀、大閘蟹、東風螺、長腳蟹、橋底辣蟹、等等，都係原汁原味用手拿住最開心架麻。

秘製牛展飯，還是紅酒汁牛展飯啊？沒有任何期望，抱著一試無妨的心態，因為從來未食過會讚的菜色。熱熱的品嚐，人生首次遇到非常鬆軟的牛展，綿綿軟塾，有肉香無羶味，還蘊藏清淡肉汁，坊間牛展理應嚥韌、膠感有趙頭，但這幾片完全背道而馳，十分特別有個性。

膽粗粗用少許紅酒汁撈啖飯試試，實在太過淡口喎，味道都被白飯搶去了 ﹗唯有狠狠地將所有汁跟白飯合體，以兩啖汁一啖飯的比例連軟滑牛展齊齊食，就係這種味道喇 ﹗香甜非凡還散發微微酸味，激發食慾到極至，驅使我連翻追擊，一下子全部消滅﹗餘下兩啖飯就泡進雞湯灌到嘴裡去，特濃雞湯夾雜紅酒汁牛展味道，擦出耀眼火花，味道獨特，飲到一滴不漏，高潮過後舒服晒 ﹗

雙冬羊腩煲，本應晚市才有的雙冬羊腩煲，所以老闆需要點時間才能預備好呢，請耐心等候。做到心浮氣燥無留意張相添，醒唔起係火鍋煲，唔係煲仔菜個煲，非常大兜無緊要，我係上水都習慣一個人食晒整個羊腩鍋。那麼我暫不要菜不要飯，到最後真係唔夠飽先要啦，不想浪費食物。早餐打邊爐，午餐羊腩煲正常不過啦﹗明火有氣勢，眾食客都投以羨慕目光，唔好望喇，無您地份啊。

足料滿到瀉，勁多羊腩啖啖肉，肉多骨少，連羊尾羊腿都有得嘆，配上馬蒂、冬筍、冬菇、枝竹格份香甜。羊腩肉鬆軟入味淡淡羶香不過份，羊皮爽彈膠滑，羊尾爽脆骨膠原，羊腿肉結實嚼勁十足，醬汁調得出色醒神開胃津津有味。

羊腩湯濃郁清甜忍唔住飲兩碗。飲完渾身是勁，全身暖笠笠。依個煲堅送飯一流，真係兩三碗飯走唔甩。真心好想好想撈飯，淋上羊肉湯，夾舊肥美腩肉滾埋腐乳醬，一次過掃入口，必定無得頂到大叫出來啦﹗平靚正，勁多羊腩又多料，超值好味道﹗我自問大食，走飯走菜淨食都感到非常有難度，一個人清晒成煲好有壓力。色香味、價錢、用料都無可挑剔大滿貫，十分飽、平靚正，份量多，無得彈﹗

蠔仔肉碎雞湯泡飯，居然會連生菜都一齊煮，即時處理掉先。熱辣辣塞入口，依舊爽嫩多汁。配雜菌那麼奇怪？鮮冬菇、秀珍菇、雞髀菇，全部滑彈清甜，湯汁散發菌類獨特芳香味道，感覺良好。蠔仔數量也不少，老闆落足料，絕無欺場 ﹗肥嘟嘟飽滿蠔仔，微弱的鮮味，淡淡的蠔汁，肉碎太少湯底甜味不足，水份太多，賣相顯得空盪盪，而且味道淡茂茂啊。出殺手鐧勁落胡椒粉，味道終於濃郁多了，全部食晒無浪費。