目牛鮮湯腩

營業中

休息中

Item: 目牛鮮湯腩
Rating: 2
Author: 奧志雷

14 食評

味道

環境

服務

衛生

抵食

560

紅磡

$50以下

潮州菜港式粉麵/米線咖喱茶餐廳/冰室

奧志雷

等級4

2.1K

燦記榮休後此舖位都荒癈多時，終於有食肆進駐，那麼大膽開清湯腩？祝好運咯。初開業時每刻都人頭擁擁排長龍，新屎坑過氣後食客數目有點回落，終於有綠一試。那位高大阿嬸及四眼佬似曾相識，到底是誰？好似係南越牛河做過喎，收銀四眼佬欵似係南越牛河個老闆，可能人有相似，未能證實。

蠔油芥蘭，賣相碧綠聞到菜香，十分誘惑。最頂一條爽甜無比真的使我老懷安慰，再食落去厚厚葉片粗糙，大大碌莖厚厚皮脆卜卜而帶渣，當食甘蔗還不錯。蠔油菜芯，幫襯幾日最好食係您喇﹗有鮮菜味、有菜甜、有菜汁，不苦不澀，夠嫩無渣熱辣辣，清得一乾二淨。蠔油生菜，夠熱夠油潤立立令，凶湧的水份趙到索索聲。淨食生菜非常淡口沒怎樣的菜甜味道喎。蠔油比一般食肆清淡，沾上同吃還合格，嬸嬸稱沒有韮菜花供應，季節性的嗎？

蜆蚧鯪魚球，新鮮炸爐熱熱的，香噴噴送到，聞得到的魚香。驚喜的味道使我老懷安慰，終於有道菜值得一讚好味道。外皮嚥韌香口，裡面魚肉彈彈，鮮魚味橫行無忌，搭載蜆肉沾上蜆汁，咸鮮無敵食得津津有味，推介食得過。

煎蝦餅，即叫即煎製作需時請耐心等候，煎得兩面焦香金黃而且非常油潤，滋養我的雙脣立立令反晒光。聞一聞蝦氣突出，趙一趙微彈結實，鮮蝦味道及香氣連環緊扣，實在出乎意料之外喎，還有咸鮮的餘韻，食得過食得過。煎墨魚餅，剛剛煎起金黃熱騰騰香噴噴，咬啖試試。結實帶油香，再咬多兩啖試試，味濃腥腥，到底怎做到的？

淨藥膳豬手，筷子散發濃烈漂白水味，唯有只用羹食吧 ﹗滾都唔滾下就直接倒出黎，極討厭的微溫湯汁，不熱的湯那會好味道。全為豬皮沒什麼肉食，爽脆類的豬手，不軟不綿帶微弱黏感。大量腳底皮鞋鞋的，有點心理關口，食得不舒服。

清湯牛三寶湯伊走蔥，肥嬸小心地放下，非常靜態見不到沒什麼煙冒，亦聞不到什麼香氣，感覺不到什麼熱力。當然先飲啖湯，微微的暖意，清湯真的十分清湯，淡淡的悶悶的，隱約察覺到少少八角味，沒有想飲盡的意慾。

蘿蔔咬一口已想掉，老帶澀味，削皮不夠乾淨，沒有半點清甜味道，外暖內凍。咬多口試真一點，難食到火都黎，立即掉低放棄。牛腩、牛肚、牛筋各兩件，腍劈劈的牛肚，彈而結實的牛腩，滑而硬的牛筋，全部淡而無味，食不到絲亳牛肉天然鮮甜，完全失敗。連生龍清湯腩都更加好食，早點收隊罷啦﹗幸好我有顆善良的心，會比多幾次機會您。

伊麵已被烚到蛋味流走，麵味消散。湯底已經極淡，麵條甜味薄弱就更淡，而且質地過腍在溶化邊沿。極度討厭麵條碎濕濕，師傅不會專登剪斷我長長伊麵麻？短短一節節食到疾住疾住，吞到一肚空氣，不能一氣呵成大啖大啖地吸啜，感覺不良好﹗食到無心機，是但馬虎倒晒落肚算數。

脆口爽腩湯河走蔥，何解油潤得很？湯底依舊清淡，水感十足，淡淡然輕輕牛肉湯味道，飲慣特濃膠黏牛骨湯的我，真的感到非常意外。爽腩比鮮腩味濃一點點，味道質地比煲湯瘦肉可口少少，較彈較軟較多汁。蘿蔔不得了﹗依舊帶澀不甜有點渣，盡咬兩啖頂不緊放棄。河粉天生味淡搭著偏淡湯底，食得不太滋味，幸好完整帶滑不散碎。快快手連湯連河粉掃入口，河粉份量都較多，價錢來說抵食。

清湯崩沙腩麵走蔥，慢功出細貨，賣相非常討好，擺位設置夠講究靚靚仔出場。溫度暖得來夠熱，拍幾張遺照就即刻處理。牛腩不覺崩亦沒有沙，趙落是是普通的鬆軟肥腩。淡淡然的牛腩味道，夠濕潤夠肉汁尚可免強達標。蘿蔔依舊一啖投降，苦澀不爽甜，真係不如唔好出仲好啦﹗終於無剪斷我的長壽麵，可以暢快地啜啜啜。見到對面長髮四眼妹食緊碎濕濕短實實伊麵真陰功，不停夾不停夾再不停夾，顯得好攰好忙，食到疾住疾住真係慘慘豬。

師傅係唔識、唔知道、還是懶啊？鹼水麵到底有否過冷河沖乾淨？強烈霸道野蠻無禮的鹼水異味攻鼻醃眼，頂硬上撈辣椒油食晒去，不想浪費！漿嘴黏口的麵質，連湯汁都同樣沖漬著難受鹼水味。唯有試試用上桂林辣椒油，希望能夠掩蓋一點。不過實在太馬虎喇麻，微辣強咸的辣椒油，是鬼旦全部塞晒入口吞落肚。麵底份量真的不少，清湯腩以這價位來說算經濟抵食的。但我要質素，不是要貪平囉。

濃香坑腩清湯濃郁甜美，沒有被河粉、幼麵、伊麵所污染，飲得清爽暢快。濃香坑腩甘香蝦子撈麵，坑腩？找不到條坑在那啊﹗平凡普通的瘦腩，幸好鬆軟有點牛汁有點牛味。試勻爽腩、崩砂、坑腩，爽腩似坑腩、崩砂似肥腩、坑腩似瘦腩，特徵不突出，三種外貌都差無幾，真係十分可疑。坑腩牛肋骨之間的肉，肉味較香濃，連着牛骨軟膏。最正統爽腩牛白腩，是薄薄一塊筋膜，咬口煙韌爽脆。崩沙腩牛的橫膈膜，筋膜連少少肉，肥瘦剛剛好。

早前嘆過十八層地獄惡嗅鹼水湯麵仍猶有餘悸，膽粗粗抱著食家應有的冒險精神挑戰撈麵。將幼麵跟蝦子撈均後即時大啖啜到舌尖上，十分正常的味道，沒有壓味、沒有異味，可以放下心頭大石咯。微暖微爽帶點濕，不夠乾身去水不夠徹底，蝦子真係甘香咸鮮有質素。食到一半再次感到疾住疾住，師傅您又走去剪我既長壽麵呀？到最後直頭碎濕濕，極之令我生惡﹗

魚蛋鮮腩伊麵走蔥，以 $8 蚊的代價換取雙併的服務。湯底依舊偏淡泛著微弱牛肉味，蘿蔔依舊不甜帶潯淡荗荗。點鮮腩竟然比爽腩，早前點爽腩就比牛腩，師傅好難捉摸，還是不懂分辨？厚厚肥美彈滑，軟綿多汁，陣陣清香牛甜味，意料之外合格。

有水準的潮州白魚蛋，雖然只有輕輕的彈性，不過魚味突出，散發可口咸鮮。伊麵有輕微的進步，長返一點點，完整返一點點，但依舊過腍發脹，烚到完全無全無晒味道，真係硬著頭皮吞落肚。沒有麵味只有滾水味的伊麵極為難食，唯有出動大量辣椒油希望起死回生，不料桂林辣椒油只咸不夠香辣，捲住牛腩大大啖盡快馬虎倒晒落肚算喇。

牛筋粗麵走蔥，師傅煮錯鹼水麵問可否接受，正常當然無謂，但我定一定神，回想早前的鹼水麵惡嗅難當，立即耍手擰頭啦﹗請煮過碗正確的粗麵我吧。奇怪地湯底比起幼麵、河粉、伊麵更清甜香濃既呢？牛筋乃我喜愛的質地，軟綿滑滑黏黏不硬不爽的，入味得宜帶甜不過咸。

粗麵腍身微溶黏口不舒服，不香不爽不滑，趙得不暢快。又係辣椒油打救既時候，捲起辣椒油求其大啖大啖迅速消滅掉。蘿蔔保持依然厚皮帶渣不甜，一口放棄。到底依群師傅是否不懂煮麵？鹼水麵、粗麵、伊麵同樣可怕，唯獨福麵頂級好食！

咖哩薯仔鮮腩飯，無得選爽腩坑腩崩砂腩？不過已有靚腩坑腩及腩片在內呢。滾熱辣送上，一撈出煙，非常好 ﹗並不是馬虎淋個汁就隊出貨給我的。每件牛腩結實爽爽彈彈的，不是軟綿綿類。別具特色，牛味甜美，跟飯及咖哩異常合拍，非讚不可，開心滿意。咖哩汁厚薄清爽，不是黏稠厚厚。味道豐富不單調，香料芳香還散發鮮茄洋蔥薯仔味道，有果酸有薯甜，比起茶記有更高層次。就算牛腩已被我全部清掉，都忍不住撈多兩三啖飯，有質素食得過，色香味令我諗起大埔咖哩至尊。

藥膳雞河走蔥，雞件分配夠公平，有髀有胸也有翼。胸肉鞋鞋，上髀滑滑，下髀彈彈，中翼散散。清清淡淡的藥膳湯，飲得出有果皮、杞子、川芎、白芷，少許雞甜味道，微甜水水不過不失還可以。河粉熱辣辣，但湯汁暖暖地，大啖一索河粉滾水味霸道，用滾水拖完再放湯的嗎？成團河粉沉底，立即動手夾起挑散跟湯汁融為一體，連湯送到嘴裡，舒服美味得多了。河粉煮得美妙可口，綿婂完整不散碎，長啜長有夠暢快，最後差不多所有湯都被我吸乾咯。

咖哩牛腱湯麵，蘿蔔沒有最差，只有更差 ﹗師傅再下兩成，不止厚皮帶渣硬掘掘，入口酸酸的即時吐掉，想嚇死朕咩﹗鬆軟牛腱飄著陣陣羶味，從來未試過，幸好還能食得落，頂得住。咖哩湯底水汪汪淡茂茂，與我幻想會像日式咖哩拉麵般黏黏稠稠的背道而馳。飲多兩啖試真一點，這種味道似足隔離民康車仔麵，有趣有趣。

以前不知道咖哩撞麵會變紅色而有點擔心，後來發現因為咖哩粉與鹼水麵有化學反應，是對身體無害的。膽粗粗再次以身犯險，入口漿嘴超壓異味鹼水麵，可怕無比萬劫不服﹗不過水直接出貨供食客享用，帥傅到底有否自己試食過的呢？嗅到有點反胃，勁落辣椒油都未能掩蓋一點點，不想浪費頂硬上吞落肚吧﹗不過蝦子撈麵非常正常懂得過水，難道師傅覺得湯麵就不需要嗎？

咖哩薯仔牛脷，眼測已發現咖哩汁薄衣衣水汪汪，既然黎左都要比面照砌啦 ﹗兜兩下就將咖哩汁連牛脷鋪在薄餅上預備捲起出擊，誰知大大舊舌尖放係面前﹗師傅您成條脷隊出黎會否有點可怕呢？仲要睇到滿佈脷胎添。您太睇得起我，真心有點唔開胃，食慾大打節扣，完全唔想食咯，食左幾十年牛脷重來未遇過這狀況。莫非食牛鞭會成個龜頭放係度咩？牛鞭伊麵免切成抽上，唔該晒。

薄餅製作需時請耐心等候，不過我估計只是微波爐翻熱吧。熱辣辣香噴噴跟咖哩牛脷一同送上，我已經畜勢待發，要殺個措手不及﹗咖哩水淡淡的不香不辣，太薄完全掛不到牛脷亦掛不到薄餅，拿起手已漏走大部份，食得辛苦唔舒服唔開心。牛脷味淡不羶不甜，質地軟腍腍。薄餅散發油香焦香嚥嚥韌韌咸咸地，比咖哩牛脷更好食，試一次便夠。

咖哩薯仔牛三寶，味道有淡中濃、質地有薄中厚揀的嗎？食三次就三次都唔同質地唔同濃度。第 1 次咖哩鮮腩飯中中滿意；第 2 次咖哩牛脷淡薄劣評；第 3 次咖哩三寶濃厚非常好。由細到大我對傻仔一向麻麻，內內外外都係一名食肉獸，不論傻條、傻餅、傻圈、傻蓉只能抱著試一口的心態，這件大大舊粉粉腍腍可以的。要等成廿十分鐘才送到，是否因為牛腩未炆好嗎？牛腩特級爽彈，不可以話係韌，超有嚼勁要出力趙。金錢肚就十分爽彈不是腍劈劈，更美味過癮。牛筋最出色，黏膠軟綿味濃。

甘香蝦子撈麵清湯幾乎沒有味道，比清湯還要清，連牛味也沒有，淡如水的蘿蔔湯，但油淋淋的，早前食過鮮腩甘香蝦子撈麵既清湯濃郁好味架喎。清湯蘿蔔，劣質的蘿蔔根本沒有勝算，不如收手罷啦﹗難食得出奇，唔出好過出，慳返少少錢買好一點的食材更好。

甘香蝦子撈麵走蔥，為何要搞我既長壽麵呀？我極討厭將麵條剪斷，怕小朋友哽親？短實實一段段，食到疾住疾住火都黎﹗出前一丁您唔去剪？意粉您又唔去剪？撈麵兩三分鐘已經送到，但我的咖哩三寶等到十分鐘已過，忍無可忍問下有無漏單，肥嬸話仍然做緊，最終廿十分鐘才到步，我碟撈麵凍冰冰啦！

自製咖哩撈蝦子幼麵。鹼水麵就算掛著大量咖哩依然散發輕微壓嗅味，救命﹗幸好還撐得住。咖哩汁厚厚濃濃，香料味豐富強烈，停不下將所有咖哩連牛三寶吃掉，事後有點頸渴咯。

濃香坑腩牛丸湯粗麵，這就是傅說中的坑腩？味道淡茂茂像湯渣一樣，質地乾鞋帶韌。牛丸竟然屬牛丸皇血統，特濃牛味霸道，肉汁瘋狂激射，味道留在齒縫舌頭上久久不散，超讚牛丸。何解連粗麵都會散發少量鹼水壓味？不會是跟幼麵一齊煮的麻？倒下大量咸咸微辣辣椒渣，免強可以掩蓋一點點。真的沒什麼穩陣選擇，伊麵碎濕濕烚定淡茂茂過腍，生麵超壓異味受不了，河粉時好時壞，時散碎過腍劈劈，時完整綿滑滑，粗麵糊口黏黏不清爽不滑彈。

咖哩薯仔滑雞飯，嬸嬸話咖哩雞即叫即煮所以製作需時，要等耐一點啊。真係鮮煮的話當然高興，最緊要好味道。要我等足廿分鐘竟然提供如此低質食物，實在太過份﹗見到碗飯我即時臉色一沉，中硬伏逃不掉。其實可以再少一點飯呢，但嬸嬸話怕我食咖哩追飯食唔夠喎。好好好，您放低吧。眼測已知道白飯濕濕爛爛，入口黏黏糊糊濕淋淋，完全唔想再食落去。

第 4 次點咖哩，試齊厚中薄、濃中淡口味。依碗屬濃厚味道，香甜豐富可口我鍾意，免強撈汁吞幾啖爛飯頂頂肚，餘下全部唔食掉丟。早前食咖喱牛三寶同樣等勁耐，回覆製作需時，牛腩無味兼質地硬掘掘，非常明顯牛腩未炆好。依次等廿分鐘好明顯真正原因係飯未煮好﹗為何不坦白講無飯呢，我可以轉麵轉河轉伊，無需要白白浪費我寶貴既青春及時間！

撩下撈下試件雞，雞中翼一開二，滑嘟嘟可以既，再來雞翼尖，都係滑嘟嘟無咩肉食，再來又係雞翼尖﹗我即時呆一呆，想點呀？求那其急急啜晒雞肉算數。仲有件雞背脊跟尾，已經沒有期望，火都黎﹗最後中大奬，有四份一件雞上髀﹗骨多肉少，骨衫衫而且多碎骨，雞食晒可以走人，留低大大碟爛飯益您地啦﹗

目牛鮮湯腩 營業中 休息中

目牛鮮湯腩

營業中

休息中