香馥樓

營業中

休息中

難得平日有時間，約朋友放工黎銅鑼灣食飯。簡左黎銅鑼灣二期食中菜。中菜廳顏色以白色同淡紫色為主，配搭幾舒服，檯與檯之間距離比較寬敞，感覺舒適。點好茶後，店員會幫忙洗杯同筷子，而茶同熱水都會用蠟燭保暖。先黎一碟小菜，涼拌青瓜雲耳，味道酸酸甜甜，青瓜爽脆，好開胃。咕嚕鳳梨黑毛豬肉好適合打卡，擺盤好靚，仲放咗乾冰營造氣氛。先講咕嚕肉，酸甜醬汁係啱啱好咁裹住外皮，咕嚕肉係啱啱整起，食落去外脆內軟，黑毛豬肉偏瘦，但肉質都好好淋，好容易咬開，就咁食唔配飯都唔會覺得肥膩。就算等咗一排再食都好脆，另外想讚一讚伴碟嘅菠蘿表面又輕輕燒過，菠蘿鮮甜多汁。鍾意食咕嚕肉嘅必試。椒鹽鮮魷魚外殼系薄薄嘅炸皮，配上新鮮嘅魷魚，魷魚唔會炸到過龍一啲都韌，一咬即開，加上少少嘅蒜味，唔錯。鮮蟹肉桂花瑤柱炒米粉第一下感覺好大碟，米粉面上鋪咗好多蟹肉，撈起個米粉，會見到幾多瑤柱絲同蟹粉，去上爽脆嘅銀牙，幾好食，每一啖都食到裡面嘅配料，唔會油膩，而且大大碟，應該足夠3個人食。最後埋單嘅時候，店員送上一杯紫藍色嘅飲品，原來係柚子茶配碟豆花，幾好飲，朋友都同我都食得好滿意。