3 Italiani (已結業)

喺銅鑼灣食完晚飯之後，我同朋友都想食甜品，係OpenRice搵到呢間甜品店，好多野嘅賣相都幾精緻，所以決定去試一試。叫咗一個紅絲絨蛋糕，本身都唔知道紅絲絨係乜， Google一下先知道原來佢都係可可嘅一種，咁咪即係朱古力蛋糕囉？但係佢又好似冇乜朱古力味，類似一個淡淡地嘅海綿蛋糕。但係估唔到佢嘅質感都幾硬下，都要花啲力氣先將佢分得開，女仔如果想優雅咁食一件蛋糕就冇乜可能啦。比起蛋糕，我覺得係呢度嘅咖啡仲出色。叫咗一杯凍嘅latte，感覺上牛奶同咖啡嘅比例都平衡得唔錯，雖然我唔係專業嘅品評咖啡人，但我都覺得佢嘅咖啡味道都幾出色，甘香得來又唔會苦澀。