666泰船麵 (仁愛街) (已結業)

今日經過新蒲崗，就上網睇吓有啲咩好食，見到有間泰國嘢好似幾好咁就去咗試！一入到去冷氣足！所以熱辣辣都夠膽叫船麵！今次我叫咗個細嘅牛肉船麵，因為想試多啲唔同嘅食物！以為細就會好小？結果10分足料！有炸豬皮，牛腩，肥牛，牛丸，蘿蔔！蘿蔔好淋好入味，肥牛亦都唔係街市好肥嗰啲貨色，唔係低價嘢，炸豬皮都唔係好多地方見到有！食到中途嘅時候店員見到我碗麵冇乜湯，仲主動話俾多一碗湯我，好細心呀！所以最後我都飲晒佢，因為牛肉味好濃好好味，嗰晚返到屋企竟然冇口渴，證明唔係味精而令到個湯好味！小食方面我叫咗泰式生蝦，同埋泰式酸辣鳳爪，生蝦好爽口食得出係新鮮野，鳳爪係無骨，硽得好入味！正！最後就叫咗杯酒精飲品，叫做華欣網紅特調toffee apple！又真係幾打卡嫁！甜甜地好易入口！其實仲有一啲小食例如黑松露蝦餅好想試！不過真係好飽啦！下次會再去！