利寶閣 (已結業)

見今日母親節，想出去慶祝，咁啱見到呢間餐廳有推出母親節套餐，就想去試吓，結果去到之後就失望到極點。呢個套餐有一道餸叫翡翠玉帶子，其實就係西蘭花炒帶子，本身都冇咩問題，但係佢啲帶子完全唔新鮮，甚至係臭嘅，無奈之下唯有叫啲職員幫我哋換個碟。另外有條魚叫清蒸沙巴仔，都係完全唔新鮮，條魚睇上去好似死咗好耐咁，甚至啲魚肉有少少霉，已經唔係好好胃口，佢另外有個甜品喳咋送，但係佢個甜品溝咗好多花奶，而且仲要勁稀，好似飲緊水咁，係我最差嘅飲食體驗。講完佢啲餸，就講吓佢個環境啦。本身啲餸已經唔係特別好食，食到一半仲有一隻無比巨大嘅烏蠅飛咗過嚟，一次都算，仲要飛咗嚟好幾次，不單止，佢仲要食埋成個餐最好食嘅菜，碟菜仲要淨係食咗兩啖，迫於無奈叫個職員收走佢，到最後埋單嘅時候，完全冇比過任何優惠，用原價收返我哋錢，真係以後唔會再去，有人請都唔去。