和茶房鐮倉夢見屋 (已結業)

今日同家人到愉景新城行下，帶埋3個小朋友去玩下。玩到咁上下小朋友話肚餓，本身打算去食個m記，但實在太多人啦，最後被呢度門口隻大顛噹貓吸引所以決定坐低食少少野。有機咖啡伴日本紅豆蓉：咖啡上檯時係齋啡，自己加糖之後可以加cream 落去，我就選擇左唔加糖，一啖紅豆一啖咖啡咁，咖啡味唔算香亦唔夠熱，紅豆味偏甜但如果加埋落苦苦嘅咖啡入面就啱啱好。凍牛奶咖啡伴紅豆蓉：因為本身杯咖啡入面已經有牛奶所以就冇提供忌廉，不過咖啡好似偏小，牛奶味夠重但咖啡味略嫌淡左少少，本身杯咖啡都係冇落糖所以加埋紅豆蓉一齊飲就剛剛好。白玉綠茶雪糕抺茶：有好香嘅抺茶味但偏苦，冇落到任何糖所以我老公飲唔慣，白玉彈牙尚算唔錯，綠茶雪糕嘅綠茶味都好足夠。士多啤梨喵pancake：小朋友一見到呢個甜品就開心到不得了，佢係一塊厚嘅pancake上面有忌廉同士多啤梨，唔知係咪因為pancake厚嘅關係好難切，士多啤梨本身酸酸地加埋cream一齊食就剛剛好，不過50幾蚊好似唔係幾抵。另外仲叫咗一杯抺茶Latte冇影到，不過真係好苦冇茶味亦都唔係好夠奶味。所以呢間野係食個環境同埋令小朋友食得開心啲，食物來講未算太好但不過不失。