荔園茶餐廳 (已結業)

係尖沙咀一個人行街，買完野係商場行出黎，突然覺得有啲肚餓，就去揾下野食。過左馬路之後行一陣就見到門口有隻公仔，抬頭一望係荔園茶餐廳。荔園，可以話係上一代香港嘅回憶，仲記得細個跟爸爸去過荔園玩，自然都有返啲特別嘅感覺，所以入去試下都好。一入門口就有一啲標示住呢到同荔園有關嘅裝飾：掛係天花板嘅馬、牆上面嘅掛畫、天花板用嘅燈泡同埋扮階磚嘅枱，真係幾有感覺。到重點喇，叫左個Dino噴火咖哩配慢溫牛肋肉飯，加多杯黑牛。見佢講噴火，本身以為會係入口好辣，椰汁味濃果種咖哩，但食落先發覺係另一回事。咖哩本身嘅性質比較貼近印度咖哩，普通茶記嘅咖哩汁完全冇得比，辣味香多於辣，而辣嘅感覺會係食左落去先出返黎，辣而不嗆，唔錯。再講牛肋肉，慢煮嘅牛肋肉好林。美中不足嘅係個飯太軟，如果乾身啲就好。最後就係我最期待嘅畫面-黑牛。黎到之後趕得切係雪糕未融之前食左兩啖，幾好食。等佢融埋之後撈埋再飲，一個字，爽！可樂嘅氣同雪糕嘅甜味撈埋之後正好解左咖哩嘅辣味，飲完之後成個人都舒服曬，好想攤係到訓教。荔園茶餐廳，食物尚算ok，價錢唔係特別親民，但尖沙咀區，加上回憶所帶黎嘅滿足感係筆墨形容唔到，值得一試。