好燒式串燒專門店 (砵蘭街)

營業中

休息中

天氣凍凍地， 特別鍾意食啲熱氣嘅嘢 。想去bbq 但係又要約埋一大班人好麻煩，決定搵間串燒店過下口癮。 牛油金菇包 入面充滿咗好多牛油，牛油味好重。比平時 自己燒嘢食嘅金菇燒得好好多，金菇一啲都冇燶到而且啱啱熟，好嫩口。 最左手邊嘅係鴨舌串，平時唔係好食鴨舌嘅我都忍唔住食番兩嚿。因為好惹味之外，口感幾彈牙。 左手邊第二串係豆腐，豆腐用咗甜甜哋嘅蜜糖燒，燒到外脆內嫩。左起第三串為虎皮尖椒，尖椒就比較辣，因為佢入面有好多辣椒 種籽，食得辣嘅會覺得好正，因為夠香口 刺激。最右手邊嘅係雞尖串，味道都係辣味為主，非常之惹味，如果份量多啲就更好啦。 牛肋肉肉質鮮嫩得嚟又有口感，啖啖充滿牛肉嘅香味 同埋肉汁。 燒嘢食一定要叫韭菜，因為咁先令韮菜嘅香味菜汁發揮到出嚟，而且食落去辣辣地好過癮。 原條燒茄子 落咗好多蒜蓉， 香蔥，辣椒粉呀一齊去燒。 茄子燒恰到好處，口感好嫩滑，味道一流。最後一度係海蝦串，海蝦都幾新鮮，肉質結實唔黐殼。 外殼甜甜哋，非常惹味。