鮪世市場 (已結業)

我成日覺得，食壽司係最能夠體會 “一分錢一分貨”：你畀得起錢，自然較大機會食到新鮮啲肥美啲嘅好嘢；否則的話，你唔想破費，去爭鮮食八蚊碟壽司，就要預咗食啲咩落肚😂。鮪世市場隱身於將軍澳厚德街市旁，只有八個座位，係名副其實嘅小店。餐牌上最平嘅壽司九蚊起就有交易，價錢十分親民，幫襯當日唔太肚餓，我揀咗八款壽司（三文魚壽司，北寄貝壽司，赤貝壽司，酒煮榮螺壽司，特大赤海蝦壽司，日本帆立貝壽司，火炙帆立貝壽司同蟹膏軍艦），加埋都只不過係百鬆啲蚊，好抵食。店員落單後，隨即開始製作，好快就有得食。說實話，以呢個價錢，食到呢種質素，我係絕對收貨，因為所有壽司 size 正常，面頭嘅刺身厚度亦正常，質素雖然講唔上驚為天人，但都算新鮮肥美，絕對襯得起呢個價錢，比元氣好百倍。唯一要改善嘅係飯嘅溫度，可能因為啱啱煮熟，稍為熱咗少少，呢度要留意返。