大力棒棒摩登中菜 (已結業)

同朋友去大力棒棒摩登中菜食晚餐，本身已經訂咗檯，不過都要晌門口等好耐先入得去。呢度啲菜式名都幾得意，我哋每人揀咗一款。晾衫白肉，差唔多張張檯都有叫，個賣相又真係幾有趣嘅，好似人哋晾衫咁。食起上嚟白肉冇味，要蘸埋辣油食先得。七味脆西施，即係加咗七味粉嘅炸豆腐，外皮脆、入面嫩滑。飽受折磨，呢個名真係好正，完全估唔到係咩，實物嚟到先知原來係炸金菇。都真係幾佩服佢哋嘅創意，將本來好普通嘅菜式包裝到好特別咁，食落有啲似台灣嘅鹽酥菇。川式回鍋肉，雖然話係辣，不過對於食得辣嘅人嚟講只係啱啱夠喉。士多啤梨酸甜骨，每個酸甜骨上面都蘸咗士多啤梨醬，有少少似平時食嘅菠蘿咕嚕肉，酸酸甜甜咁。麻辣皇帝雞煲，呢個雞煲可以加錢轉蒜蓉牛油多士盒，咁樣食雞煲都係第一次。入面全部雞都係啖啖肉冇骨，個麻辣醬汁都幾香同辣，仲可以用個多士嚟蘸汁食，食落都幾惹味。芝麻吊燒企鵝雞，我諗因為插住咁上檯，所以就叫企鵝雞，係要預訂先有得食架。一出場就成為咗大家嘅焦點，金色紳士帽、士多啤梨眼，個樣搞笑得嚟又有少少恐怖，好似俾人行私刑咁。影咗陣相，侍應就拎隻雞返廚房斬件。嗰日隻雞個皮都算脆，仲可以夾埋底下啲烘麵包皮一齊食。