發哥粥底海鮮火鍋 (已結業)

友人突然好想打邊爐，跟佢嚟到大圍呢邊食粥底火鍋。我哋點咗龍蝦餐，侍應好快就先送上兩款開胃涼菜同埋一壺竹蔗水。竹蔗水飲落唔算好甜，幾健康。燉湯有成五、六款湯料好足料，飲落味道清甜滋潤。新鮮鮑魚煮幾分鐘就食得，肉質好結實，咬落彈牙好好味。主角龍蝦好新鮮仲有少少蝦膏，蝦肉爽口彈牙唔錯。多寶魚肉質比較淋，好滑溜。蟶子雖然熟咗卷埋一舊但其實好多肉，食落鮮甜，爽口彈牙。貴妃蚌肉質豐滿實淨，食落韌韌地有口感。海蝦夠新鮮彈牙。安格斯牛肩肉油脂分佈均勻，食落牛味好重。火鍋配料好多選擇，各款味道都合格有餘。最後食埋個海鮮粥，每啖吸收咗海鮮嘅甜味，味道天然。