老馮茶居 (海寶花園)

初初一開始係比呢度嘅裝修吸引，加上兵仔本人又好鍾意食點心，當然要嚟一試啦！除咗必食嘅燒賣，其實都仲試咗好多唔同嘅點心，例如牛柏葉、排骨等等，全部都係高水準！另外都有睇佢有啲咩特別推介，都仲有試蝦餃、腐皮卷呢啲，點心主要都係新鮮滾熱辣出爐，同埋全都食得出係用心製作！蝦餃皮薄餡靚，入面啲蝦大大粒又新鮮，腐皮卷都係好足料！砵仔蒸飯我都十分推薦，肉餅飯都係，肉質鮮嫩又鬆軟，而我最鍾意都係蝦醬蒸腩仔飯，腩仔肥瘦適中，蝦醬味道亦都令到成個飯嘅味道有一份鹹香，非常惹味！係一間裝修靚嘢食又好味嘅茶居！頒發軍階：元帥🎖🎖🎖🎖🎖