Big John (已結業)

其實我都成日喺尖沙咀食飯，但真係一次都未見過呢間餐廳。依間餐廳係喺樂道，iSquare附近，但平時行過都唔係好發覺。今次係朋友帶我嚟呢度食飯先第一次嚟，佢嘅鋪頭唔係好大，都係得十幾個位到。但因為我哋早嚟，所以一入去就有位坐。呢到主打都係食港式家常菜，有飯有麵揀。佢一個lunch set有麵、小食、湯或者嘢飲，盛惠$59，不過我轉咗做公仔麵，所以就要加多$3。今日就揀咗食酥炸鯪魚球公仔麵，小食方面我揀咗食滷水雞翼，同埋飲中湯。去counter買完嘢食之後佢係會送過嚟你個位嗰度，都幾貼心。想講個酥炸鯪魚球係超級大粒，仲要有三粒。我食得出佢係啱啱炸起，因為係好脆同埋熱辣辣。至於個滷水雞翼，我就覺得佢唔夠淋。要讚下嘅就係佢個老火湯，今日係西洋菜湯，真係好似屋企嘅味道咁，完全唔覺得係味精湯，飲落去好舒服下次再嚟我一定會試吓其他嘢食，同埋再飲佢個湯。