大飯糖甜品小食屋 (已結業)

有朋友搬左去天水圍，捱左咁多年終於有自己的物業！真的恭喜！我們和幾位中學同事一齊上去house warming，9點幾左右大家話餓，我同太太就一齊落去睇下有無糖水。天盛街市好多野食，愈夜愈有機，五光十色，好彩搵到間糖水。香蕉紅豆粒西米露，香蕉我看到是新鮮切的，這項要加分！紅豆可能雪過了，比較硬，整碗糖水都夠甜，本身已經有椰汁，小弟第一次食香蕉的西米露，香蕉的香味都滲入，這個搭配意想不到那麼夾。鮮雜果涼粉，要讚就是的確是用新鮮生果，涼粉唔苦，晶瑩剔透，椰汁都好多，夠甜，一打開碗時見到全部都是黃色水果，原來還有西瓜在底部。太太order了紅黑，是紅豆沙加芝麻糊，一打開蓋，好香的芝麻味，這個由於是熱食，所以紅豆好淋，每粒都起沙，軟綿綿的，芝麻好香濃，食起來好滑，芝麻對身體好，多吃無妨！西瓜汁絕對無溝水，真係食到新鮮西瓜味，有打到爛的西瓜蓉！建議大家先飲西瓜汁再食其他食物，可以飲到西瓜的鮮味，不會被其他食物的濃味而搶去了！