程班長台灣牛肉麵 (已結業)

據說，程班長牛肉麵喺台北饒河街屹立二十一年（但係點解我去咗咁多次，都唔覺嘅？），曾經榮獲台灣第十屆國家品質保證金像獎，其紅燒牛肉麵更曾創下日賣三千碗嘅紀錄，連馬英九總統同大S都係忠實擁躉。之前喺OpenRice睇過好多網友嘅食評，好壞參半，而且各走極端。而我自己試過之後就覺得個湯底確係如好多網友所講，太多油，而牛肉麵嘅主角—— 牛肉，就太韌，肉質又有點粗糙，同永康牛肉麵嗰種香腍入味嘅牛肉實在相差太遠！反而麵條嘅口感又唔錯喎，幾彈牙，而配角滷水蛋半隻都幾入味。如果我冇去台灣當地食過正宗嘅紅燒牛肉麵，可能會覺得呢碗麵OK嘅。總括嚟講，非常認同蔡瀾先生喺《壹周刊》所寫嘅食評：沒在（台灣）當地吃那麼夠味，但也比其他香港人做的好得多。