Das Gute (已結業)

繼續「好友狂嚐曲」系列，好多麵包店都有做埋曲奇，Das Gute Bakery都唔例外，原來Das Gute晌香港都有唔少分店。其實Das Gute屬於A-1麵包集團，風格主要售賣天然健康嘅德國麵包為藍本，售賣含高纖產品為主。晌食友間相聚嘅飯局上，食友送上嘅喺一小包Das Gute什錦曲奇，透明包裝襯墨綠色絲帶，小巧別緻。雖然睇落好似好細包，查實內裡都有成廿多塊，每塊形狀一樣，以花形餅模吸出嚟，嬌小的骰，一啖一粒，當小食又得，當下午茶都得。朱古力曲奇、核桃曲奇、杏仁曲奇、紅莓乾曲奇整體味道唔錯，口感幾鬆脆，香就幾香，不過稍為油份重咗啲，所以雖然細細包，但兩公婆一次過都唔可以清晒成包，都好吖，分兩日嚟下午茶，嘆多一轉。個人就鍾意朱古力同核桃多啲，前者幾濃郁，又有啲果仁碎；後者就甚有咬口，麥香又重身啲。至於杏仁同紅莓乾都唔喺差，只喺嫌佢兩者杏仁碎、紅莓乾都落得有啲手緊，感覺唔夠突出啫。一口曲奇，一啖紅茶，嚐嚐曲奇，想想你哋，又要藉此晌度多謝各位食友！