泰斗 (TKO Gateway西翼) (已結業)

早幾日傍晚都想嚟試下呢間開咗無耐嘅泰國餐廳，不過撞正落場時間，今晚仲諗緊游完水食咩好，經過見門口攞飛嘅人唔多，拎飛後好快就入座。點咗菜聽到後面枱嘅客人話申請做會員，八卦嘅我即刻睇下枱上申請做會員嘅牌有咩優惠，我哋亦問過店員呢一餐嘅總費用同埋可以即時用返現金券，我哋都申請咗做白金會員，費用係五百，有11張$50現金券同埋其他coupon。多口問埋黑金會員嘅價錢，無記錯係六千定六千幾。呢一餐我幾滿意，味道真係唔錯，正唔正宗我都唔太清楚，不過就好啱我哋口味。串燒沙爹豬，鹽燒牛舌，兩款都好好味，原本本時嘅人係鐘意牛舌多啲，但係今次豬係更好味，有少少似豬頸肉咁爽但唔係豬頸肉，一啲都唔鞋，好味。泰式香燒雞(半隻)，唔會太乾亦唔會好濕，唔會太鹹，雞胸亦唔鞋，份量都幾多，唔錯。明爐魚，影得比較差，雖然多幼骨，但係有魚味。泰式炒河，唔油，又香。橙汁，應該係最唔好嘅一樣。