皇庭匯 (已結業)

7月21日開張當晚已經率先品嚐左1次。芝士焗龍蝦仔一隻$78加伊麵底$38，只有龍蝦仔有芝士，伊麵底完全無汁無芝士仲要係白烚，埋單2百幾3百蚊都0k接受範圍，結帳方式好記得係碌卡！係碌卡！係碌卡！覺得龍蝦仔幾好食又唔貴，於是今晚帶埋屋企人去食，3個人叫左2隻芝士焗龍蝦仔$78x2，今次冇加伊麵，始終上次個伊麵已經中左伏！！再叫多個孖寶，埋單$414，食飽飽打算埋單走人既時候，收銀丫姐就話我地冇碌卡嫁，未申請到。仲要拍收銀張枱話已經貼左紙。問心而論，第一次食飯可以碌卡，相隔2星期話卡機未申請到？你張通告紙剩係貼係收銀位，真係要到人埋單個一刻先知？如果無咁多現金係身呢？係咪訂幾圍酒席既人都要帶定2,3萬現金係身？重點係部長態度超級差，當時情況係，我問收銀丫姐:冇得碌卡？開張個日我落黎食都係碌卡埋單。企係格離有個部長即刻話:唔洗理佢，佢敢唔比錢出門口就報警。真心覺得，如果我一入門口已經知道呢間集團式酒樓係無得碌卡既，我可以選擇去㩒錢再黎食/直接食第二間，而唔係食完比錢個一刻先知，有種比人老屈左既感覺。而且咁既服務態度，真係永遠唔會再幫襯。