燒烤堂 (已搬遷) 新店位置

今日book左7點去食係旺角嘅燒烤堂，係門外已經聞到燒烤嘅味道，舖頭入面大概有十幾張枱，我地入去嘅時候都滿左一半。2個人食左蒜蓉茄子、牛油蒜蓉焗金菇、蜜糖雞中翼、雞軟骨、鹽燒牛舌芯、汁燒魷魚鬚、日本一口甜薯、燒軟骨免治雞肉棒（日本雞蛋）、日本芝士年糕、蜜糖牛油年糕，仲叫左椰青水同竹庶茅根，呢兩枝都係枝裝嘅飲品。茄子唔會太多蒜蓉搞到太咸，而且又夠淋又香。焗金菇就重牛油味，同時蒜蓉夠香，金菇都爽口。蜜糖雞中翼係甜甜地，而且肉質唔會太硬同太焦，唔錯。雞軟骨上面有啲鹽都好夠味。鹽燒牛舌芯口感好好，好爽口，而且唔會燒到好硬好難咬。汁燒魷魚鬚好多汁，味道唔錯。日本一口甜薯真係好好食，出面有鹽，但係入面係甜嘅，食到咸之後又變翻甜，個皮有少少脆，食落唔似係薯仔嘅感覺，所以好特別。燒軟骨免治雞肉棒（日本雞蛋）係雞肉棒沾蛋食，點完之後有好濃嘅蛋味。日本芝士年糕可以點煉奶，芝士味咸但煉奶又加翻啲甜味中和翻。蜜糖牛油年糕就冇乜牛油味，不過都煙韌同有啲蜜糖味。總括而言，燒烤堂食物質素唔錯，可以再次光臨。