上海婆婆336 (已結業)

今日Happy Friday同老公食好啲，去咗東港城食上海婆婆336，今次叫咗雞絲涼拌粉皮，上海炒麵，小籠包，高力豆沙做甜品。雞絲涼拌粉皮有麻醬撈雞絲，粉皮好薄身撈埋一齊都幾好味。上海炒麵得好少配料，但啲麵炒得好乾身，有啲芝麻好香口，所以都好食。小籠包個皮勁薄，入面勁多汁，即叫即整，真係皮薄餡靚，超級好味。高力豆沙係外脆內軟，個皮好鬆軟，紅豆好香，都好好食。兩個人食咗3百幾蚊，環境好好，好舒服，食物都唔錯。