亞婆豆腐花 (已結業)

經常幫襯呢間阿婆豆腐花。昨晚行過，又買咗兩碗，店員問我拎走定係度食，我話拎走。佢又問我要凍定要熱，我話要凍的。佢話熱嘅滑啲香啲喎，識食梗係要食熱㗎啦。我聽完又覺得幾有道理，於是就決定買兩碗熱豆腐花返屋企。店員又問我要黃糖定要糖水，一向主張健康飲食的我當然揀黃糖啦。店員幫我加咗好多黃糖，我好驚佢咁重手會甜死我，點知返到屋企一試，甜度又啱啱好。果然是熟能生巧，佢每日賣咁多碗豆腐花，招呼咁多客人，梗係知道糖的份量要落幾多。熱豆花的確是香啲，依然好滑，好好味。