德福軒 (已結業)

某集團的高層請食飯，地點是德福軒。這家酒店的位置很"墮角"，唔講我都唔知這裡有間酒店。因為大人物請食飯的關係，沒有人遲到，大概七點幾已經人齊。或許是地方較為隱蔽，只得三兩檯客，頗冷清。點菜方面當然是由主人家發板，要咖哩牛尾煲、炸蠔、蒸魚、炸子雞、燒味拼盤和西生菜等，仲有紅酒、啤酒和汽水咁啦，都幾豐富。不過唔知點解冇叫例湯。燒味拼盤麻麻地，似是雪藏了一段時間的，毫冇鮮味。反而咖哩牛尾煲就唔錯，好香咖哩味，牛尾亦好正，連主人家都大讚一流。西生菜是白酌的，幾清淡，不過我倒幾鐘意，夠晒不味，又夠健康。炸子雞雞皮好脆，可是肉質較"鞋"，唔多理想。魚方面，相信那條是星斑，幾大條，但就蒸得老了些少。炸蠔就好得多，香脆而且蠔又夠大隻，十分欣賞。或許是大人物請食飯的闔係，大家都食得比較拘謹，唔多發言。而且紅酒又冇咩人飲，頗浪費。總括而言，食物只是一般，侍應都只懂招呼大老闆，對其他人略為疏忽，未算稱職。