同心泰國菜館 (已結業)

小弟幾鍾意食海南雞飯，特別係去埋骨既更鍾意，所以間唔中都會去好時沙爹(其實都一排無去...)食，近排見某位網友食評講呢度，見倒原來呢度又有去骨海南雞飯而且價錢都比好時平好多，咁就黎試下。果然一分錢一分貨，去骨雞去得唔乾淨，份量亦比較小，不過講味道都幾好的，但d雞油飯就麻麻，一舊舊咁，佢個醬就得一種不過好濃味幾o岩我胃口，碗湯反而可以算係成個餐最好的。另外呢度雖然係泰式菜館，但環境好似茶餐廳咁，個地下都唔多乾淨.... 嚴格黎講我覺呢餐緊緊合格啦。但係！我食食下見倒有個帶紅色cap帽既人行入黎，係咁依望o左一眼覺得幾面善，再聽倒佢點菜時把聲，跟住再望清楚，咦？呢個咪....孻姑姐！？唔係我孻姑姐而係高朋滿坐入面果個孻姑姐，即係苑瓊丹，又真係估唔倒，不過咁都唔算驚喜，驚喜既係佢一個人叫o左好多野食，我諗兩個我都未必食得晒既份量，而且似乎佢好鍾意飲呢度d雞湯~ 呵