黃金美食

營業中

休息中

今晚同老婆去完深水埗食晚飯，行去新高登商場隔離個停車場攞車啦！見到有間糖水舖，主打中式糖水，就行過去望下啦！見到佢個餐牌全部手寫，重要寫到好鬼潦，本身都覺得無咩heart，隱約見到杏仁露，陳皮紅豆沙，綠豆沙同埋核桃露咁啦！於是我地就叫左碗杏仁露同埋核桃露外賣啦！價錢超值，都只係15蚊一碗，呀姐就重要不到滿一滿咁，俾錢果時見到有茶葉蛋賣，竟然係10蚊3隻，唔洗諗啦！買埋啦！40蚊攪掂。返到屋企開箱，杏仁露真係食得出自己磨，唔係開粉，食落去重有d杏仁沙，糖水好香，好濃，但係又唔會死甜，絕對超出15蚊嘅預期。跟住就到核桃露啦！因為頭先碗杏仁露令到我地好高期望，一開，滿滿嘅糖水再加上香味，試啖先，糖水都係好濃，唔會水汪汪，而且都食得出係自己磨，食落去有d渣，而且好香核桃味，絕對推介。最後就到茶葉蛋啦！好入味，同埋食得出係媽媽嘅味道，隻蛋好大隻，應該係湖北蛋，蛋白同蛋黃都好入味，又係唔會死咸，好香，10蚊3隻絕對係超值。而家e個時勢開店好艱難，姐姐真材實料，絕對推介，重要咁平嘅價錢，完全係性價比超高，之後一定再幫襯，咁有媽媽味道嘅小店真係買少見少。