大滿喜日本料理 (已結業)

去食晚市放題，夜晚黃金時段見到佢完全唔使等位，相反五樓爆哂要攞飛等位，已經心知不妙。但冇辦法因為非常肚餓，就即管試一試佢。點知食物質素非常之差，食咗一嚿煙三文魚壽司，腥到要吐返出嚟，啲飯一夾就散開。刺身都唔掂，刺身冇乜點擺位就拎上嚟檯面。而且三文魚有根，刀工又唔得，刺身一嚿連住另一嚿，北寄貝係完全冇味，好似食緊一嚿膠咁。熟食方面，羊架柴到死， 天婦羅完全唔係嗰回事，油益味好重，食物選擇又少。成晚唯一可取就係啲嚟貨嘅食物，例如係蒲燒鰻魚，榴槤炸彈，haagen dazs雪糕，呢啲都叫正常發揮。但環境叫做坐得闊落嘅，不過裝修就唔係高級。 有少少返咗大陸嘅感覺。