一八六一廚房 (已結業)

估唔到寶琳街市可以食到咁好味嘅漢堡，真係好有驚喜，要介紹吓。佢嘅麵包全部都係自家製嘅，用唔同嘅天然材料整出唔同顏色嘅麵包，賣相吸引又健康，最緊要係啲包完全唔黐牙😍招牌手打牛肉漢堡餐，$68話明招牌梗係要一試，仲可以加唔同嘅配料，我就加$6要咗炒蛋，你睇個顏色就知炒得好好。手打牛好厚好juicy，一啖要咬晒麵包、蛋同牛肉都幾困難🤣佢嗰醬汁都好好味，應該用蕃茄醬再溝其他醬汁，啲醬流到塊麵包度，正。bbq板燒雞腿漢堡餐，$68呢個就俾咗黑色嘅竹炭包我，賣相都好吸引。大大塊雞扒真係啖啖肉，bbq汁都好惹味，食完又唔會覺得滯，好唔錯。套餐包嘢飲同雙薯薯條，可以加錢換其他小食，選擇都好多，薯餅、吉列蠔、沙律都有，相當豐富。呢度最特別之處係，每次叫嘅包嘅顏色都會唔同，係老細安排，薯條嘅口味都會唔同，今次就俾咗紫菜味我，我返去用焗爐焗熱嚟食，好好味，尤其係蕃薯條😍 而家新開仲有優惠，大家把握機會去試吓啦。