深夜食堂 (已結業)

放工同個朋友去左尖沙咀行街, 行到咁上就諗住食啲野輕鬆下, 之後就去左厚富街搵食, 見到有招排深夜食堂就覺得好吸引咁沖左上去。入到店爆爆地, 幾驚冇位坐, 幸好職員哥哥好細心叫我地等陣話有人賣緊單, 唔洗兩分鐘就執好張枱比我地。舖頭地方唔算大, 但盛在環境乾淨, 裝飾都好特別好有日本料理感覺, 岩曬放工過黎鬆鬆。坐底個刻真係超口渴, 即刻叫左兩杯野飲, 我叫左杯荔枝特飲, 朋友叫益力多沙冰。杯荔枝特飲好甜同清新, 岩曬行完街好攰既我, 而朋友杯益力多乳酸沙冰都好好飲, 係夏天解渴既妙品。之後叫左魷魚, 味道鮮甜既魷魚帶上山葵既清新感覺, 十分醒胃, 加上咬感十足, 係非常好既前菜。由於本人喜歡魷魚, 所以再來炸鮮魷,, 味道正常, 口感脆卜卜, 值得一提係蛋黃醬, 真係好好味, 同炸鮮魷啲味好合拍, 結果啲醬係比我食曬咁濟 。鐘意食芝士又鐘意健康一定要食呢個芝士翠肉瓜, 我朋友對呢個菜讚不絕口, 芝士既分量多到呢, 真係好滿足。最後同朋友叫左碗大大碗既牛肉黑松露鵝肝飯做主菜, 呢個飯真係不得了, 三種味道濃郁既食材係口裡面爆出黎感覺真係無比既豐富, 呢個真心係必食, 出面啲舖係食唔到呢