韓城 (已結業)

未到禮拜尾夜晚想食好啲但又唔想食太貴，諗起之前有朋友介紹過嘅韓城，位置就腳，旺角登打士廣場，於是放工之後就拉埋同事去食。相信香港人對韓燒都唔陌生，說穿了就係比一兩舊水任你食醃好左嘅豬牛雞，但韓城除左做韓燒之外，韓式涼菜、中式切雞、熱食、日式刺身、軍艦都有，食物種類比預期嘅多。（切雞都有喎，邊個估到）第一輪因為太肚餓，相都冇影就首先食左熱食同涼菜打個底，飲左碗紅湯，然後先開始鯨吞肉類：肉類最主要你講得出嘅豬扒牛扒雞扒雞翼肥牛牛仔骨豬頸肉雞腎牛柳粒魷魚多春魚都有齊，質素符合期望，醃料如黑椒汁十分惹味，肉類質地中規中矩。如是者食左兩輪肉，其間因為燒多春魚落唔夠油燒到痴晒爐板所以換左一次。終於有啲滯嘅時候，店員送上每個人頭兩條大蝦同一隻帆立貝。蝦味鮮甜，帆立貝嘅群邊爽口，令人食指大動。其後食左轉燒茄子同菇，兩轉雪糕，飲左烏龍茶冬瓜茶消滯後，意猶未盡挑戰多次多春魚後就埋單，每人兩百蚊都唔洗就喺旺角捧住個肚返屋企，性價比高，推薦！