丼瀛 (已結業)

一行二人到佐敦廟街整完嘢見肚餓就喺附近揾地方食晚飯，因為天氣太熱有成35度，所以決定食日本嘢無咁熱。見呢間丼瀛門口個餐牌上面嘅丼瀛龍蝦刺身雙層爆丼好吸引，而家仲要有“試食價”當然要走入去幫襯下。我哋叫左份丼瀛龍蝦刺身雙層爆丼(試食價$268)，同一份築地壽司杯($168)。龍蝦刺身雙層爆丼上層係全隻龍蝦加上八款的鮮魚刺身，帶子、三文魚、墨魚、八爪魚……等等。龍蝦好大隻，蝦肉做成沙律，蝦肉爽口彈牙，加上做自家製嘅沙律醬，好好食。幾款鮮魚刺身都好新鮮，仲有半隻味美溫泉蛋，材料非常豐富，叫“爆”丼真係實至名歸！下層係海膽蒟蒻沾麵，中間個醬係海膽芝士醬，海膽同芝士嘅味好夾，蒟蒻麵非常爽滑，撈埋青瓜絲一齊沾個醬食，令人印象深刻！築地壽司杯賣相精緻，每一個杯入面係壽司飯加同嘅刺身，甜蝦、魷魚、他他、三文魚、黑松露海膽，仲有蟹子反卷同原隻鮑魚，材料夠晒豐富。刺身新鮮好食，其中他他、黑松露海膽味道濃郁，好好食！醃過嘅鮑魚一D都唔韌同時又保持到鮑魚本身嘅味道，正！我哋呢日比較早六點鬆少少就到，餐廳入面仲未有咩客，但到七點左右就已經坐滿人，下次再嚟幫襯就記得要訂位先！