麵館皇 (已結業)

昨晚當完夜班，做埋啲手尾已經十一點幾。雖然唔係太肚餓，但都是但搵咗間嘢食。行都呢間門口，老闆娘（好似係, 同MENU上既女人差唔多樣）就好熱情大叫"入嚟試試啦”。見咁就腳，就決定呢間。呢間麵館皇有幾間分店。謝斐道呢間好近地鐵站。銅鑼灣c出口過一條馬路就到。擺設係茶餐廳風，乾淨企理。而且門口寬敞，容易睇住自己架車。（頭盔：本人並非在此鼓勵違例泊車)食品主要係川滬菜為主。口水雞，紅油抄手，韭菜餃，刀削麵。今次點咗碟麻辣口水雞，藥膳湯底手擀麵，凍豆漿。口水雞味道不會太鹹，比其他川菜鋪出色嘅係選材。雞肉處理得恰到好處，連雞胸肉都覺得滑嫩。而且我見每碟都係雞胸加雞腿，唔會俾啲雞骨雞肋敷衍了事。手擀麵，又稱燴麵，製作手法好考師傅功力。上品係厚度闊度適中統一。上菜時個鍋仲滾緊，可見係湯麵一齊煮，令麵條更加入味。湯底只會散咗淡淡的藥材味，怕飲中藥的我也覺得份外滋味，把湯全部喝掉。埋單50幾，幾扺。開完夜，食個藥膳煮麵，好像補返身咁。