富臨皇宮 (已結業)

今次一家大細去到富臨皇宮酒樓食晚飯，酒樓以白色為主，係我最鍾意嘅顏色。入到去酒樓佈置以白紫設計，而且座位非常舒服，一張圓枱比我地四個人坐。侍應們都好有禮貌，即刻開茶位俾我哋，仲同我地推介呢度嘅招牌乳豬。除此之外，餐牌都有好多特價美食。一向鍾意飲湯水嘅我，即時叫左一盅金銀菜燉白肺，入面材料豐富，果然真材實料，有非常濃郁同埋好入味嘅白肺，好正。當然之後要叫返半隻BB乳豬，外皮非常香脆，而且肉質鮮嫩，咬落去啖啖肉好小肥膏，難怪係酒樓嘅招牌菜式。小菜方面分別叫咗豉汁蒸大鱔、花膠北菇鵝掌煲同埋香薯一口牛。不得不讚就係一口牛外皮非常香脆，咬落去好有質感，而且薯仔好林，非常入味，必食小菜之一。最後叫咗幾款甜品試吓，香芒糯米卷必食呀，估唔到芒果一啲都唔酸，而且芒果份量都比較多，好想再encore。最後埋單都只係＄700有找，四個人平均消費每人＄200都唔使，咁嘅價錢非常超值。