旬彩火鍋

營業中

休息中

九龍灣MegaBox都有唔少餐廳選擇，呢日去shopping見到呢間日式火鍋店，裝修幾靚，空間感十足。餐廳主打日式火鍋放題，平日一人一爐價錢由$158起至$398，120分鐘任點任食。湯底選擇都好多，包括有壽喜、旨辛、昆布、飛魚湯、豚骨、豆乳、蕃茄及柚子貝柱湯。最重要係一人一鍋，可以按自己喜好揀選心儀嘅湯底。由於朋友係肉食愛好者，我哋點咗$398嘅餐，入面包括: 美國肥牛、西班牙栗豚、美國精選牛肉、美國牛板腱、日本黑毛和牛、美國SRF極黑牛。牛質素相當高，牛味濃郁，入口嫩滑。除咗牛之外，豚肉質素都好好，入口充滿濃烈嘅豬肉味。餐廳亦有自助區，提供有前菜、多種蔬菜、菇類、豆腐、丸類、小食等。麵食則有辛辣麵及出前一丁，簡直係打邊爐必食之選。自助區亦有飲品及甜品提供，包括果汁、汽水、茶飲等。甜品有沙冰同多款配料選擇，亦有雪糕、乳酪、豆腐花等，相當多元化。餐廳地方寬敞，環境舒適，晚餐放題呢個價錢已經有日本黑毛和牛同美國SRF極黑牛，其他食物質素亦相當不錯，抵食之選。